Hvað og hvar er Torrevieja?

Torrevieja er gamalt fiskimannaþorp við Miðjarðarhafið, staðsett nánast á miðri "Costa Blanca" strandlengjunni (hvítu ströndinni) á suðausturströnd Spánar,
um 45 km fjarlægð suður af alþjóðaflugvellinum í Alicante. Gríðarleg uppbygging hefur verið á þessu svæði síðustu ár og í dag er Torrevieja borg sem telur um 100.000
fasta íbúa og annað eins af ferðamönnum sem dvelja þar í lengri eða skemmri tíma, ýmist í sínum eigin húsum eða leigja. Borgin er afar vinsæl meðal Þjóðverja og Breta.
Ennfremur er talsverður fjöldi af Svíum og Norðmönnum. Talið er að um 400 Íslendingar búi í þessari borg árið um kring en á sumrin margfaldast sú tala.
Má ætla að fjöldinn sé þá um 5000 manns. Borgin er í raun afar athyglisverð vegna þess mikla fjölda Íslendinga sem þar hafa sest að til lengri eða skemmri dvalar.
Ekki veit ég hvort kalla megi þetta vísi að Íslendinganýlendu??
 

  

    

Torrevieja er ósköp venjuleg spánsk borg með allri þeirri þjónustu sem hugsast getur og prýðir helstu borgir.
Veitingastaðir eru á hverju strái og af öllum stærðum og gerðum. Þá er stór vatnleikjagarður (Aquapolis), go-kart braut, tívolí,
dýragarður, sirkus, uppákomur hverskonar, sérverslanir, tískuvöruverslanir, magasín, fjöldi götumarkaða og margt fleira.

Baðstrandirnar (sólarstrandirnar) eru mjög margar, sumar með þjónustu s.s. útleigu á bekkjum, hjólabátum, sæsleðum o.fl.
á meðan aðrar strandir eru litlar og fámennar með engri sérstakri þjónustu.


      

Margir spyrja okkur að því hvort auðvelt sé að komast á milli staða á Torrevieja. Því er til að svara, að á Torrevieja eru að sjálfsögðu leigubílar
og strætóar en hiklaust mæli ég með því að fólk hafi bíl til umráða. Ekki vegna þess að fjarlægðirnar séu miklar, heldur til að njóta alls
þess sem svæðið hefur uppá að bjóða. T.d. eru stórir götumarkaðir, bæði inn í hverfum en líka uppi í sveit. Þá munar miklu í verði að versla í betri
stórmörkuðum en hjá kaupmanninum á horninu. Ennfremur þegar farið er á ströndina taka reynsluboltar ávallt með sér nesti og drykki
og það munar um að þurfa ekki að bera slíkt. Auðvelt er að keyra á Torrvevieja - mun auðveldara en í Reykjavík -
eða það segja margir eftir sinn fyrsta bíltúr á Torrvieja.

Til fróðleiks má geta þess að mikið er af saltvötnum á Torrevieja og er saltvinnsla þar mikil. Meðal annars er talsvert flutt til Íslands af salti frá Torrevieja. Það er talin
mikil heilsbót að baða sig í saltvötnunum, ekki síst fyrir öndunarfærin, sérstaklega lungun. Saltgufur frá vötnunum eru taldar hafa þar góð áhrif og eru m.a. til
margar fræðigreinar um lækningamátt þessara saltvatna. Loftið á Torrevieja er talið eitt það heilsusamlegasta sem völ er á, m.a. vegna lækningamátts saltsins.

  

Kortið hér að neðan sýnir einstök íbúðahverfi á Torrevieja svæðinu.